D’Gewalt an d‘Angscht kenne keen Enn
Déi lescht zwee Joer ware fir d’Kanner aus der Ukrain vun Zerstéierung, Verdreiwung, Gewalt souwéi Trennung a Verloscht vun hire Famillen a Frënn gepräägt. Si hate kee sécheren Zougang zur Bildung an zur Gesondheetsversuergung. Et ass eng Bildungskris entstan an d’psychesch Gesondheet vun de Kanner baut ëmmer weider of.
Gewalt & Zerstéierung
Am Laf vun de leschten zwee Joer hunn d’Kanner, déi no un der Krichsfront liewen, tëscht 2.800 a 4.800 Stonnen a Bommekellere verbruecht. Dat sinn ëmgerechent insgesamt 4 bis 6,5 Méint voller Angscht. Virun allem déi lescht Méint waren elo besonnesch schrecklech: Et koum an der ganzer Ukrain erëm zu enger Eskalatioun vun den Ugrëff op Wunnhaiser, Schoulen a Spideeler. Voller Angscht hoffen d’Kanner an den äiskale Loftschutzkelleren op en Enn vun dësem grausame Krich.
Och an deene Momenter, wou grad keng Loftugrëff stattfannen, sinn d’Kanner a permanenter Liewensgefor. Ronn een Drëttel vun der Gesamtfläch vum Land ass mat Minnen an explosive Réckstänn vu Krichsmunitioun kontaminéiert.
Bildungskris
Nach ëmmer gi Schoulgebaier zerstéiert. Duerch d’Ugrëff op zentral Infrastruktur feelt et u Stroum an Heizung, an de Schoulen a virun allem an de Bommekelleren ass et dowéinst kal an donkel. 40 Prozent vun de Kanner an der Ukrain kënnen net reegelméisseg an d’Schoul goen, an der Géigend vun der Front sinn et d’Hallschent vun alle Kanner am schoulpflichtegen Alter.
Dobäi sinn d’Schoule fir d’Kanner vill méi wéi just Plazen, wou si léiere kënnen. Si ginn hinne Struktur an d’Méiglechkeet, hir Dreem ze verfollegen. Et si Plazen, wou si mat Gläichaltregen spillen an interagéiere kënnen. All dëst ass wichteg fir hir Entwécklung an hir mental Gesondheet.
Enorm psychesch Belaaschtung
Fir vill Kanner beschränkt sech d’Bildung op Online-Unterrecht. Wa si net an d’Schoul goe kënnen, hänke si oft net nëmme schoulesch hannendran, mee leiden och meeschtens immens ënnert der Isolatioun. Zesumme mat der Angscht an dem Verloscht mécht dëst de Kanner oft schwéier ze schafen.
Bei ville vun hinne manifestéiere sech Problemer wéi Ängstlechkeet, Phobien, verstäerkt Trauregkeet, Empfindlechkeet géigeniwwer haarde Geräischer a Schlofstéierungen. Et ass wichteg, dës Problemer fréi genuch unzegoen, fir ze vermeiden, dass d’Kanner hiert Liewe laang dorënner leiden.
Mir bleiwen un der Säit vun de Kanner
UNICEF bitt eng wichteg humanitär Hëllef an der gesamter Ukrain an an den Opnamelänner. Innerhalb vun der Ukrain läit eise Schwéierpunkt dorop, de Kanner e sécheren an dauerhaften Zougang zu Impfungen, Gesondheetsversuergung, Ernärung, Schutz, Bildung, Waasser, Sanitär an Hygiène souwéi zu psychosozialer Ënnerstëtzung ze garantéieren.
An den Opnamelänner schaffe mer mat de Regierungen, de Verwaltungen a lokale Partner zesummen, fir déi national Systemer ze stäerken an de Flüchtlingskanner eng qualitativ Bildung, eng Gesondheetsversuergung a Protektiounsdéngschter ze bidden.
